मुंबईत फक्त २९ लाखात म्हाडाचे घर; अर्जासाठी उरले फक्त ३ दिवस

Mumbai MHADA House 29 Lakh :मुंबईत स्वत:चे हक्काचे घर घेण्याचे स्वप्न पाहणाऱ्या सर्वसामान्यांसाठी म्हाडाने (MHADA) मोठी संधी उपलब्ध करून दिली आहे. म्हाडाच्या मुंबई मंडळाच्या २०२६ च्या सोडतीला (Lottery) नागरिकांचा उदंड प्रतिसाद मिळत असून, आतापर्यंत तब्बल ८४ हजारांहून अधिक अर्ज दाखल झाले आहेत. विशेष म्हणजे, या सोडतीत सर्वात स्वस्त घर अवघ्या २९ लाख रुपयांना उपलब्ध आहे. मात्र, या सुवर्णसंधीचा फायदा घेण्यासाठी आता फक्त ३ दिवस उरले असून, २९ मे ही अर्ज करण्याची शेवटची तारीख आहे.

एका घरासाठी ३२ जणांची स्पर्धा

यंदा म्हाडाने मुंबईतील विविध भागांमध्ये एकूण २,६४० घरांसाठी लॉटरी जाहीर केली आहे. या घरांसाठी आतापर्यंत ८४,७८२ जणांनी अर्ज केले आहेत, तर ५९ हजारांहून अधिक अर्जदारांनी अनामत रक्कम (Deposit) भरून आपली दावेदारी निश्चित केली आहे. याचाच अर्थ, यंदा म्हाडाच्या एका घरासाठी सरासरी ३२ जण स्पर्धेत आहेत.

सर्वात स्वस्त घर २९ लाखांत

यावर्षीच्या लॉटरीचे प्रमुख आकर्षण म्हणजे घरांच्या किंमतीत झालेली घसरण. म्हाडाने विक्रोळी पूर्व (कन्नमवार नगर) येथे नव्याने बांधल्या जाणाऱ्या १,२२१ घरांच्या किंमतीत थेट ७.५ टक्क्यांची कपात केली आहे.
सर्वात स्वस्त घर: या सोडतीत मानखुर्द येथील घराची किंमत सर्वात कमी, म्हणजे फक्त २९ लाख रुपये आहे.
सर्वात महागडे घर: ताडदेव आणि अँटॉप हिल सारख्या उच्चभ्रू वस्त्यांमध्ये ६.८२ कोटी रुपयांपर्यंतची आलिशान घरेही उपलब्ध आहेत.
याशिवाय गोरेगाव, बोरीवली, वांद्रे, घाटकोपर, दादर, पवई आणि माझगाव यांसारख्या मोक्याच्या ठिकाणीही म्हाडाची घरे उपलब्ध आहेत.

उत्पन्न गटानुसार घरांची विभागणी

म्हाडाने सर्वसामान्यांच्या खिशाला परवडेल अशा पद्धतीने घरांचे वाटप केले आहे. २,६४० घरांची गटानुसार विभागणी खालीलप्रमाणे:
अत्यल्प उत्पन्न गट (EWS): १४५ घरे (वार्षिक उत्पन्न ६ लाखांपर्यंत)
अल्प उत्पन्न गट (LIG): ८५८ घरे (वार्षिक उत्पन्न ६ ते ९ लाख)
मध्यम उत्पन्न गट (MIG): ७९८ घरे (वार्षिक उत्पन्न ९ ते १२ लाख)
उच्च उत्पन्न गट (HIG): ८३९ घरे (वार्षिक उत्पन्न १२ लाखांहून अधिक)

अर्ज कसा आणि कुठे करायचा?

म्हाडाच्या या घरांसाठी अर्ज करण्याची अंतिम मुदत २९ मे रोजी रात्री ११:५९ वाजेपर्यंत आहे.
अर्जदारांना https://housing.mhada.gov.in या म्हाडाच्या अधिकृत वेबसाईटवर जाऊन ऑनलाईन अर्ज करायचा आहे. केवळ अर्ज भरून चालणार नाही, तर दिलेल्या वेळेत अनामत रक्कम ऑनलाईन भरणे बंधनकारक आहे. अनामत रक्कम न भरल्यास अर्ज ग्राह्य धरला जाणार नाही.

येथे वाचा – बोरिवलीत म्हाडाचा आतापर्यंतचा सर्वात मोठा गृहप्रकल्प

महत्त्वाची नोंद: ज्यांनी अद्याप अर्ज केलेला नाही, त्यांनी शेवटच्या क्षणाची वाट न पाहता लवकरात लवकर अर्ज प्रक्रिया पूर्ण करावी, असे आवाहन प्रशासनाकडून करण्यात आले आहे.